Old.Natlib.Uz - XII Xalqaro Axborot Texnologiyalari Ko’Rgazmasining Ochilishi Bo’Lib O’Tdi

XII Xalqaro axborot texnologiyalari ko’rgazmasining ochilishi bo’lib o’tdi - Bo`limga qaytish

25.09.2013

“Ko’rgazma savdo markazi”da “ICTEXPO-2013” axborot texnologiyalari milliy ko'rgazmasining tantanali ochilish marosimi o’tkazildi.
Milliy kutubxona o'z stendida O‘zbekiston Respublikasi Prezidentining 2012 yil 20-martdagi “Alisher Navoiy nomidagi O‘zbekiston Milliy kutubxonasi - axborot resurs markazi faoliyatini tashkillashtirish chora tadbirlari to‘g‘risida”gi PQ-1729-sonli qarori ijrosining ta'minlanishi qanday olib borilayotganini namoyish etdi.

Milliy kutubxona stendida barcha tashrif buyuruvchilar kutubxonaning rivojlanish tarixi, aholiga axborot-kutubxona xizmatlarini ko'rsatishning yangi shakl va metodlarini, axborot-kommunikatsiya texnologiyalariga asoslangan yangi xizmatlarning tadbiq etilgani, mavjud axborot resurslarning xilma-xilligi va rivojlanishi, nashr qilingan resurslarni skanerlash, raqamlashtirish va elektron ko'rinishga o'tkazish bo'yicha amalga oshirilayotgan ishlar bo'yicha barcha ma'lumotlarni olish imkoniyatiga ega.

Shu qatorda Milliy kutubxona stendida imkoniyatlari, fond, 12ta zalning ish tartibi va xizmatlari, Avtomatlashtirilgan axborot-kutubxona tizimining (AAKT) ishlash tartibi, bir qator taniqli elektron ma'lumotlar bazasi (Emerald, Springer, Jstor va b.)ga kirish imkoniyati mavjudligi, RF va MDH davlatlarinig davlat va soha standartlari, norma va qoidalari elektron mа'lumotlar bazasining ishlashi, kinomarkaz faoliyati va repertuari, ingliz va koreys tili klubida mashg'ulotlarning olib borilishi, “Ijodkorlar klubi”ning yig'ilishlari haqida ma'lumot beruvchi tarqatma materiallar taqdim etilgan.

Shu bilan birga stendda interfaol xizmatlar, ma'lumot izlashning dasturiy ta'minoti, Milliy kutubxona qoshida yig'ma elektron katalogni tuzish, elektron imidj-katalog va hisob-kitob tizimini yaratish, audioresurslar milliy bazasini yaratish kabi bir qator texnik loyihalarning amalga oshirilayotganligini ifodalovchi ma'lumotlar taqdim etilgan.
Shuningdek, tashrif buyuruvchilarga Web-AIBS tizimiga ulangan interfaol kiosklar va yangi zamonaviy texnik jihozlar namoyish etilgan.

ICTEXPO - 2013 ko‘rgazmasi doirasida quyidagi aksiyalar o‘tkazilmoqda:

1) «Imtiyozli ro‘yxatdan o‘tish» aksiyasi

Ko‘rgazmaga tashrif buyurgan 14 yosh va undan kattalar kutubxona foydalanuvchisi sifatida ro‘yxatdan o‘tib, imtiyozli 50% chegirma bilan ID-karta egasi bo’lish imkoniyatiga ega. ID-karta narxi 4000 so‘mni tashkil qilib, u 5 daqiqa ichida ishtirokchiga taqdim etiladi. Ro‘yxatdan o‘tgan har bir foydalanuvchi Milliy kutubxonaning barcha resurslaridan foydalanishi mumkin. Shuningdek, buyurtmalarni ko‘rib chiqgan holda masofadan turib Web-AIBS dasturi orqali rasmiylashtirishni amalga oshiradi. Elektron buyurtmalarni muvofiqlashtirish va resurslarni masofaga yetkazib berish xizmati an'anaviy hamda masofadan turib dunyoning istalgan burchagidagi foydalanuvchilarga xizmat ko‘rsatadi.

2) “Yutuqli lotereya” aksiyasi
Ushbu aksiyada ro‘yxatdan o‘tgan ishtirokchilar ko‘rgazmaning 1-2-3 kunlarida ishtirok etib, Milliy kutubxona tomonidan kitob, fleshka, bloknot, futbolka, kalendar, ruchka kabi esdalik sovg‘alarni qo‘lga kiritadilar.

3) “Super lotereya” aksiyasi ID- kartaga ega bo‘lgan kutubxona foydalanuvchilari uchun bo‘lib o‘tadi va “Super lotereya” g‘olibiga super yutuq ya'ni planshet sovg’a qilinadi.

Bundan tashqari Milliy kutubxona stendida barcha tashrif buyuruvchilar kutubxonada mavjud bo‘lgan audioresurslar haqida ma'lumot olish hamda ularni tinglash imkoniyatiga ega.

Oldin Keyin