2016 yil 3 martda O‘zbekiston Milliy kutubxonasi qoshidagi “Oila va bola taraqqiyoti markazi” loyihasi doirasida “Baxtli ota-ona - baxtli farzandlar” loyihasining birinchi moduli seminari bo‘lib o‘tdi. Seminar mavzusi “Ota-onaning uzoqni ko‘ra olishi? - tarbiya strategiyasi: farzandlarimizga qanday eng muhim narsalarni o‘rgatmog‘imiz lozim?” deb nomlanib, unda ota-onalar va kutubxona foydalanuvchilari ishtirok etishdi. 

Bahs va munozara tarzida bo‘lib o‘tgan mashg‘ulot psixolog Olga Eduardovna Avanesova tomonidan olib borildi. Ota-onalar farzand tarbiyasidagi asosiy maqsadlar va bu maqsadlarga erishish metodlari haqida to‘liq ma’lumot oldilar. Ishtirokchilar to‘rt guruhga bo‘linib, qanday alomatlar insonning baxtliligiga ishora bo‘lishi, farzandlarimizga qanday muhim narsalarni o‘rgatish lozimligi haqida bahs-munozara yuritib, har bir ota-ona orzusidagi “ideal bola” portretini tasvirlashdi. 

Mashg‘ulot ishtirokchilari tarbiya jarayonida yuzaga keladigan muammolar haqida fikr almashishdi, “baxtli oila” va “ideal farzand” tushunchalari borasida o‘zaro bahslashishdi, ko‘plab foydali ma’lumotlar, shuningdek, muhokama qilangan mavzu bo‘yicha tarqatma materiallar olishdi. 

Mashg‘ulot qatnashchilari ushbu tadbirni tashkil etgani uchun O‘zbekiston Milliy kutubxonasiga va kreativ tarzda olib borilgan mag‘ulot uchun moderator-psixolog Olga Avanesovaga o‘z minnatdorchiliklarini izhor etishdi.