2016 yil 22 fevral kuni O‘zbekiston Milliy kutubxonasining «Jahon» zalida Xalqaro ona tili kuniga bag‘ishlangan tadbir bo‘lib o‘tdi. Tadbirda O‘zbekiston milliy madaniy markazlar vakillari, kutubxona foydalanuvchilari va OAV vakillari ishtirok etdilar. Tadbirni o‘tkazishdan maqsad - har bir mamlakatning o‘z tilini, til va madaniy merosini, madaniyatlararo munosabatlarni saqlashga bo‘lgan e’tiboriga alohida urg‘u berish.

 

Milliy madaniy markazlar vakillari O‘zbekistonda istiqomat qilayotgan turli millat vakillarining o‘z ona tillari, boy madaniy va ma’naviy meroslari, unga nisbatan ko‘rsatilayotgan g‘amxo‘rlik va e’tibor haqida gapirdilar. 

Tadbirda yahudiy, ukrain, tatar, boshqird, rus madaniy markazlar qatnashchilari va O‘zbekiston Milliy kutubxonasi qoshida faoliyat olib borayotgan «Maragi» koreys tili so‘zlashuv klubi ishtirokchilari o‘z badiiy chiqishlari orqali boshqa millar vakillarini Xalqaro ona tili kuni bilan qutladilar va uning mohiyati, xalqlar o‘rtasidagi madaniy va iqtisodiy aloqalarni taraqqiy etishidagi ahamiyati haqida gapirdilar. 

Tadbir tashkilotchilari qotnashchilarning dunyo xalqlari urf-odatlarini bilish darajasini aniqlovchi viktorina va berilgan xarflardan mumkin qadar ko‘proq so‘z yasash bo‘yicha musobaqa o‘tkazdilar. Natijalarga ko‘ra, g‘oliblar O‘zbekiston Milliy kutubxonasining esdalik sovg‘alari bilan taqdirlandilar. 

Xalqaro ona tili kuni munosabati bilan o‘tkazilgan tadbir doirasida O‘zbekiston Milliy kutubxonasida ona tiliga cheksiz e’tibor va chet tillarni o‘rganishni targ‘ib etishga bag‘ishlangan kitoblar o‘rin olagan. Mazkur ko‘rgazmada chet tillarni o‘rganishni boshlovchilar va mukammal darajada egallashni xohlovchilar uchun ingliz, nemis, fransuz, xitoy, koreys, ispan, arab, chex, turk, italyan, portugal va shved tillarida o‘quv qo‘llanmalar, risolalar, lug‘atlar namoyish etilmoqda.

Tadbir ishtirokchilari o‘z taassurotlari bilan o‘rtoqlashish va O‘zbekiston Milliy kutubxonasi fondida saqlanuvchi chet tillarni o‘rganuvchilar uchun mavjud kitoblar, disklar, audio va videokassetalar bilan yaqindan tanishish imkoniyatiga ega bo‘ldilar.