O‘zbekiston Milliy kutubxonasida iste’dodli shoira, o‘zbek ayollar adabiyotining asoschilaridan biri, jozibali nasriy asarlar muallifi Saida Zunnunovaning 90 yilligiga bag‘ishlangan “Nazm va nasr sohibasi” deb nomlangan kitob-rasmli ko‘rgazma ochildi.

Saida Zunnunova 1926 yilda Andijonda tavallud topgan. Andijon pedagogika institutida tahsil olgach, Andijon maktablarida muallima, keynchalik esa gazeta tahririyatlarida adabiy xodim bo‘lib ishladi. Adabiyotta muhabbat uni O‘rta Osiyo Davlat universitetining filologiya fakultetiga yetakladi. U o‘qishni tamomlab, «Gulxan» jurnali, «O‘zbekiston madaniyati» gazetasi va Badiiy adabiyot nashriyotida, shuningdek, O‘zbekiston Yozuvchilar uyushmasida maslahatchi bo‘lib xizmat qildi. So‘zga xasislik, badiiy siqiqlik, tabiiylik, sun’iy obrazlardan qochish Saida Zunnunova hikoyalariga xos xususiyatlardir. Ona Vatanga sadoqat, mehnatga muhabbat, baxt va muhabbat tuyg‘ularini kuylagan shoiraning lirik she’rlari, jozibador qo‘shiqlari, nasriy asarlari adabiyotimiz xazinasidan joy olgan.

Ko‘zgazmada shoiraning turli yillarda «Saodat», «Gulxan», «Guliston» jurnallarida chop etilgan hikoyalari va yoshlikni, Vatanga muhabbatni va mehnatni tarannum etuvchi she’rlari, «Olov», «Go‘dak xidi», «Bir yo‘l o‘ylari», «Ko‘k chiroqlar», «Bo‘ylaringdan o‘rgilay», «Odamlar orasida», «Qo‘shnilar», «Qizingiz yozdi» kabi kitoblari o‘rin olgan. Uning asarlarida ishchilar hayoti, oila va muhabbat mavzulari o‘ziga xos badiiy bo‘yoqlarda ifodalangan. Adiba asarlarining qahramonlari ham ayollardir.

Nazm va nasr sohibasi Saida Zunnunovaning 90 yilligiga bag‘ishlangan mazkur ko‘rgazmaga tashrif buyurganlar Vatanga sadoqat, mehnatga muhabbat, baxt va muhabbat tuyg‘ularini kuylagan shoiraning hayoti, hayot qiyinchiliklariga qaramay qilgan ijodi, lirik she’rlari, jozibador qo‘shiqlari, nasriy asarlari bilan yaqindan tanishish imkoniyatiga ega bo‘ladilar.