2016 yil 8 fevral kuni O‘zbekiston Milliy kutubxonasida Alisher Navoiy tavalludining 575 yilligi munosabati bilan “Alisher Navoiy - g‘azal mulkining sultoni” nomli ma’rifiy tadbir bo‘lib o‘tdi. Oliy va o‘rta maxsus ta’lim  va xalq ta’limi vazirliklari huzuridagi ZiyoNET bo‘limlari bilan hamkorlikda o‘tkazilgan mazkur tadbirda p.f.d., professor Qozoqboy Yo‘ldoshev, f.f.n., dotsent Tozagul Matyaqubova, f.f.n. Sirdaryo O‘tanova, shoirlar Shukur Qurbon va Gulchehra Shahobiddin qizi, O‘zbekiston Milliy universiteti va Toshkent davlat pedegogika universiteti professor-o‘qituvchilari, talabalari va kutubxona foydalanuvchilari ishtirok etdilar.

P.f.d., professor Qozoqboy Yo‘ldoshev o‘z chiqishida Alisher Navoiy so‘z sehrining yoshlar tarbiyasidagi o‘rnini, shoir hayoti va ijodini o‘rganuvchi tadqiqotchilarning o‘z ilm va adab borasidagi ijobiy o‘zgarishlarini alohida ta’kidlab o‘tdi va Alisher Navoiy lirikasiga oid bir qancha g‘azallarni o‘qib berdi va ularni sharhladi. “Alisher Navoiy ijodiga yuzlanganlar uning so‘zlarini chuqurroq anglaydilar, hayot sir-sinoatlarini, uning mohiyatini yanada teranroq tushuna boshlaydilar. Shuning uchun men yoshlarga Alisher Navoiy asarlarini ko‘proq mutolaa qilishni tavsiya etaman”, dedi u. Yosh navoiyshunos olimalar Tozagul Matyaqubova va Sirdaryo O‘tanovalar esa insoniy xislatlar, odamiylik va samimiylikni tarannum etgan shoir Alisher Navoiy ijodi borasida olib borilgan va olib borilayotgan ishlar bilan tanishtirdi.

O‘zbekiston Milliy universiteti talabalari B.Nasriddinov, S.Usarov, B.To‘xtaev va H.Turdievalar buk shoir, mutafakkir, so‘z mulkining sultoni Alisher Navoiyo lirikasidan baytlar, g‘azallar va ruboiylar o‘qidilar. Shoirlar Shukur Qurbon i Gulchehra Shahobiddin qizi esa buyuk adibga atalgan o‘z she’rlarini o‘qib berdilar.

Tadbir ishtirokchilari mazkur ma’rifiy tadbirdan katta taassurotlar oldilar va uning tashkilotchilariga o‘z mamnuniyatlarini va minnatdorchiliklarini izhor etdilar.