O‘zbekiston Milliy kutubxonasi fondi “Munis design group” nashriyotida chop etilgan “Markaziy Osiyo xalqlari tarixiga oid ma’lumotlar” kitobi bilan boyitildi. Adadi 150 nus’ha, hajmi 322 sahifadan iborat tarixchi, xitoyshunos olim, tarix fanlari doktori Ablat Xo‘jaevning mazkur kitobi 2012-2016 yillar uchun rejalashtirilgan “FA-F1-G028: Markaziy Osiyo etnik tarixiga oid sharq tillaridagi qadimiy va o‘rta sar manbalaridagi ma’lymotlar” nomli fundamental tadqiqot loyihasi asosida yozilgan.
Kitob xitoy va uyg‘ur tarixchi olimlarning va yozuvchilarning asarlarini o‘rganib chiqish natijasida ularning tarjimalari va ilmiy tadqiqotlari ko‘rsatkichi vazifasini o‘taydi. Mazkur asarda miloddan avvalgi  VII-V asrlar oralig‘ida bitilgan “Zuo Chjuan”, “Erishisi shi” deb nomlangan sulolalar tarixi majmuyidan o‘rin olgan 8ta sulola tarixlari, VIII-XII asrlar oralig‘ida yozilgan 3ta yirik tarixiy asarlardagi Markaziy Osiyo xalqlari etnik tarixiga oid ma’lumotlarning ayrim qismlari ilk bor asliyat asosida o‘zbek tiliga ilmiy tarjima qilingan holda keltirilgan. Tarjimalan va tadqiqotlarni amalga oshirish jarayonida muallif XXDR kutubxonalarida xitoy va uyg‘ur tillarida nashr etilgan tarixiy asarlardan hamda turli xitoy lug‘atlaridan foydalangan. 

Kitobda keltirilgan tarjimalardan Markaziy Osiyoga tegishli toponim, etnonimlar va tarixiy shaxslarning ismlari kiril alifbosidagi o‘zbek yozuvida transkripsiyasi berilgan, chunki muallifning ta’kidlashicha, xitoy tilidagi tovushlarning talaffuzi rus tilidan ko‘ra o‘zbek tili talaffuziga yaqinroqdir va o‘zbek transkripsiyasida aniqroq ifodalanadi. Shuningdek, muallif turli millar va elatlarning etnonimi, ularning kelib chiqishi va etnik tuzilishini, ularning yashagan joylari va qadimiy turklar bilan bo‘lgan munosabatlarini tadqiq etadi.
Kitob muallifi A.Xo‘jaev kitobga turk etnonimining xitoy manbalarida yozilishi, xitoy manbalarida turkiy qabilalarning nomlari, foydalanilgan atamalarning ma’nolari, VIII-IX asrlardagi Xueyxe (Uyg‘ur) nomli qabilalar ittifoqoning tarkibi jadvalini ilova qiladi.
Kitob xitoyshunos olimlar, sharqshunoslar, geograflar, kartograflar, ilmiy tadqiqotchilar va Markaziy Osiyo va Xitoy xalqlari tarixini o‘rganuvchi talabalar uchun boy va qimmatli ma’lumotlarga ega.

O‘zbekiston Milliy kutubxonasi matbuot markazi

Oldin      Keyin