2016 yil 22 yanvar  kuni O‘zbekiston Milliy kutubxonasida “Oltin qalam” davlat mukofoti sovrindori, taniqli rejissyor Hamid Qahramonov bilan “Sahna orti qahramoni” mavzusida ijodiy uchrashuv bo‘lib o‘tdi. Tadbirda rejissyorning hamkasb do‘stlari, ustozlari, shogirdlari, Toshkent teatrlari artistlari va kutubxona foydalanuvchilari ishtirok etdilar.

Tadbir avvalida rejissyor Xamid Kaxramonov  ijodi haqida hikoya qiluvchi “Sarhisob” hujjatli filmi namoyish etildi. Unda ijodkorning 50 yillik kasbiy faoliyatining quvonchu tashvishlari haqida do‘stlari va hamkasblari, taniqli shoirlar va yozuvchilar, aktyorlar va tomoshabinlar o‘z fikr-mulohazalarini bildiradilar.

Ijodiy uchrashuvda O‘zbek Milliy akdemik drama teatri, Muqimiy nomidagi o‘zbek respublika musiqali teatri aktyorlari va ijodkorning kasbdosh do‘stlari so‘zga chiqdilar. Kursdosh do‘stlari qatorida so‘zga chiqqan O‘zbekiston xalq artisti Rixsi Ibrohimova rejissyor X.Qahramonov bilan birga Toshkent teatr va rassomchilik institutida tahsil olgan va u o‘ynagan spektakllarni sahnalashtirgani haqida xotirlagan bo‘lsa, O‘zbekiston xalq artistlari Turg‘un Azizov, Erkin Komilov, Tesha Muminovlar u bilan Milliy akademik drama teatridagi hamkorlikda ishlash jarayoni haqida gapirib berdilar. Tadbirda shoiralar Umida Abduazimova va Farida Afruz, “Bahor” raqs dastasi raqqosasi Nurxon Zulinovalar rejissyorning o‘z kasbiga ijodiy yondoshuvini alohida ta’kidladilar va maroq bilan hamkorlik qilganliklari haqida so‘zlab berdilar. Hozirgi kunga qadar O‘zbekiston Milliy teleradiokompaniyasida sahnalashtiruvchi rejissyor lavozimida ijod qilib kelayotgan izlanuvchan inson – Hamid Qahramonov har bir boshlagan ishiga ijodiy yondoshuvchi ijodkor.O‘zbek televideniesi oltin fondida saqlanuvchi, o‘zbek teatr va kino san’ati namoyondalari, sahna ustalari haqida yaratilgan   ko‘pgina ko‘rsatuvlar uning ijod namunasidir. Mashhur shaxslar hayotiga bag‘ishlangan ko‘rsatuvlardan tashqari H.Qahramonov “Shunchaki hazil”, “Palovxonto‘ra”, “Otalar choyxonasi” kabi yumoristik ko‘rsatuvlari, Shekspir, Shiller, Gyugo, Pushkin,Zoshenko, Chexov, M.Shayxzoda, A.Oripov, E.Vohidov kabi adiblarning shoh asarlari asosida spektakllar yaratgan. H.Qahramonov sahnalashtirgan “Qirq tog‘oraning qirq nog‘orasi” teleseriali esa xalqimizning sevib tomosha qiladigan filmlari sirasiga kiradi.

Ijodiy uchrashuv qatnashchilari H.Qahramonovning do‘stlari, hamkasblari va hamkorlarining u haqida so‘zlab bergan qiziqarli ma’lumotlarga ega bo‘ldilar, o‘z taassurotlari bilan o‘rtoqlashdilar va tashkilotchilarga o‘z minnatdorchiliklarini bildirdilar.