2016 yil 20 yanvar kuni O‘zbekiston Milliy kutubxonasida 2015 yil yakunlariga bag‘ishlangan yig‘ilish bo‘lib o‘tdi. Yig‘ilishda O‘zbekiston Respublikasi VMning mas’ul mutaxassislari, kutubxona rahbariyati, xizmat rahbarlari va xodimlar ishtirok etdilar.

2016 yil 15 yanvar kuni Vazirlar Mahkamasi majlisida O‘zbekiston Respublikasi Prezidenti mamlakatimizning 2015 yilda ijtimoiy-iqtisodiy rivojlanish yakunlari va 2016 yilga mo‘ljallangan iqtisodiy dasturning eng muhim ustuvor yo‘nalishlariga bag‘ishlangan ma’ruzasida o‘tgan davrda amalga oshirilgan chuqur tarkibiy o‘zgarishlarni, kichik biznes va xususiy tadbirkorlik sohasining rivojlanganligini, mamlakatimiz iqtisodiyotining jadal suratlarda oshganligini va xalqning turmush tarzi yuqori darajaga ko‘tarilganligini ta’kidladi.

Bunday islohotlar natijasida O‘zbekistonda yalpi ichki mahsuloti avvalgi yillarga qaraganda ancha oshganiga alohida e’tibor qaratib, quyidagilarni qayd etdi: «Yangi biznesni qo‘llab-quvvatlash» deb ataladigan mezon bo‘yicha mamlakatimiz ayni paytda jahonda 42-o‘rinni, tuzilgan shartnomalar ijrosini ta’minlash bo‘yicha 32-o‘rinni, iqtisodiy nochor korxonalarga nisbatan qo‘llanadigan bankrotlik tizimining samaradorligi bo‘yicha 75-o‘rinni, «Kichik biznes sub’ektlariga kredit berish» deb nomlanadigan ko‘rsatkich bo‘yicha O‘zbekiston 42-o‘rinni egallab turibdi. Jahon bankining ma’ruzasida O‘zbekiston keyingi yillarda tadbirkorlik faoliyati uchun ishbilarmonlik muhitini yaxshilash sohasida eng yaxshi natijalarga erishgan dunyodagi o‘nta davlat qatoridan joy olgani qayd etildi. O‘zbekistonnning barqaror o‘sishi sur’atlarining yana bir omili – bu mamlakatimizni demokratlashtirish va modernizatsiya qilish borasida boshlangan tizimli islohotlarning samarasidir, iqtisodiyot tarmoqlarida zamonaviy axborot-kommunikatsiya texnologiyalarini, «Elektron hukumat» tizimi keng joriy etlishidir. Bugungi kunda 100 foiz soliq va statistik hisobotlar Internet orqali elektron holda topshirilmoqda.

O‘zbekiston Milliy kutubxonasi direktori A.Xodjaev  aholining madaniy, ma’rifiy va ma’naviy o‘sishida Milliy kutubxonaning o‘rni va ahamiyati haqida so‘zlab, kutubxona faoliyatini yorituvchi dalillarni keltirdi. Hususan, Alisher Navoiy nomidagi O‘zbekiston Milliy kutubxonasi 2015 yil davomida bir qator ijobiy natijalarga erishdi. Bugungi kunda kutubxona fondning umumiy soni – 7,1 mln.ga yaqin nusxani tashkil etadi. Milliy kutubxona foydalanuvchilarining umumiy soni - 125 736 kishini tashkil etdi. O‘tgan davr mobaynida foydalanuvchilar tashrifi  755 ming marotabani tashkil etgangan bo‘lsa, bundan 137 mingga yaqin tashrif kutubxonamiz veb-sayti orqali amalga oshirilgan. Kitob berishlar soni esa qariyb 5 mln.nusxani tashkil etdi. Hisobot davrida Milliy kutubxonada 329 dan ortiq ma’naviy-marifiy tadbir o‘tkazildi. Shuningdek, asosiy maqsadi, axborot-kutubxona sohasi mutaxassislarini zamonaviy talablar va xizmat ko‘rsatish turlari bilan tanishtirish, foydalanuvchilar o‘rtasida faollikni oshirish, mutolaa madaniyatini yuksaltirish, axborot-kutubxona resurslaridan keng foydalanish, kutubxonada tashkil qilinayotgan tadbirlar ko‘lamini kengaytirish va albatta O‘zbekiston Milliy kutubxonasi foydalanuvchilari sonini oshirishdan iborat bo‘lgan “Central Asia-2015” xalqaro konferensiyasi va “INFOLIB” IV Milliy axborot-kutubxona haftaligi keng ko‘lamda o‘tazildi.

Yig‘ilishda O‘zbekiston Milliy kutubxonasining 2016 yil uchun ilmiy-tadqiqot, uslubiy, ishlab chiqarish, innovatsion, xalqaro loyihalar faoliyatiga dahlor, AKTni tadbiq etish borasida, axborot-kutubxona sohasi mutaxassislarini tayyorlash va malakasini oshirish, konferensiyalar, seminarlar, taqdimot va ko‘rgazmalar mavzulari  borasida so‘z bordi. Bajarilgan ishlar yuzasidan tegishli qarorlar qabul qilindi.