2016 yil 21 yanvar kuni O‘zbekiston Milliy kutubxonasida adabiyotshunos, manbashunos, O‘zbekistonda xizmat kursatgan fan arbobi,  O‘zbekiston Fanlar Akademiyasi akademigi, filologiya fanlari doktori Azizxon Qayumov tavalludining 90 yilligi munosabati ilmiy-amaliy konferensiya va kitoblar ko‘rgazmasi bo‘lib o‘tdi. Unda adabiyotshunos, navoiyshunos, tilshunos olimlar, adiblar va kutubxona foydalanuvchilari ishtirok etdilar.

Konferensiyada Aziz Qayumovning maslakdosh hamkasblari, davomchilari va shogirdlari ma’ruzalar bilan ishtirok etdilar. Ular o‘z chiqishlarida yubilarni muborakbod etdilar, o‘z hayotlarida, ilmiy izlanishlarida uning yo‘l-yo‘riqlari, o‘gitlari va nasixatlarining o‘rni va ilmiy va ijodiy hamkorlik chog‘larida bo‘lib o‘tgan qiziqarli voqealar haqida so‘zlab berdilar. O‘zbekiston Fanlar Akademiyasi vitse-prezidenti t.f.d. B.Abduhalimov A.Qayumovning Alisher Navoiy ijodini o‘rganishdagi va jaxon adabiyotshunosligida navoiyshunoslik yo‘nalishiga asos solgan olim sifatida e’tirof etgan bo‘lsa, “O‘zbekkino” Milliy assotsiatsiyasi raisi T.Yunusov A.Qayumovning O‘zbekiston kinematografiyasi raisi va madaniyat vaziri lavozimlarini egallab turgan vaqtlarda o‘zbek kinematografiyasi rivojiga qo‘shgan hissasi haqida gapirib o‘tdi. O‘zbekiston jahon iqtisodiyoti va diplomatiyasi universiteti professori D.Azimova “Pyateritsa izumleniy” (“Hamsatul mutahayiriyin”) asari tarjimasi ustida olib borilgan hamkorlik to‘g‘risida va ustozning uning ilmiy faoliyatidagi roli haqida so‘zlab berdi. 

F.f.d. Q.Sodiqov akademik A.Qayumovning O‘zbekiston FA Qo‘lyozmalar institutidagi faoliyati, uning rahbarligi ostida nashr etilgan Alisher Navoiy to‘plamlarini va islomgacha bo‘lgan davr qo‘lyozmalarini o‘rganishga qaratilgan e’tiborini alohida ta’kidladi. Konferensiyada A.Qayumovning o‘zbek mumtoz she’riyati vakillari ijodi, Qo‘qon va Andijon adabiy muhiti borasida olib borgan ilmiy izlanishlari, turkiyshunos olim, Aziziy tahallusi ostida yozgan she’rlari va uning rahbarligida nashr etilgan “Zaxiriddin Muhammad Bobur ensiklopediyasi” haqida so‘zladilar.

Ilmiy anjuman doirasida Aziz Qayumov ilmiy ijodiga bag‘ishlangan adabiyotlar ko‘rgazmasi bo‘lib o‘tdi. Unda “Maxmur”, “Hoziq”, “G‘oziy”, “Qo‘qon adabiy muhiti”, “Qadimiyat obidalari”, “Beruniy va adabiy ijod”, “Ishq vodiysi chechaklari”, “Ibn Sino va Beruniy” kabi ilmiy asarlari, Alisher Navoiy hayoti va ijodiy merosini o‘rganishda muhim o‘rin tutgan “Sa’ddi Iskandariy”, “Alisher Navoiy”, “Hayrat ul-abror”,  “Farhod va Shirin sirlari”, shuningdek, “Nodir sahifalar”, “Bu ohang ila bo‘lg‘aysen Naqshband”, “Bobur davridagi Andijon adabiy muhiti”, “Xoja Yusuf Andijoniy” kabi asarlari o‘rin olgan. Bu ko‘rgazmada adabiyotshunos va manbashunos olim Aziz Qayumovning 10 jildlik “Asarlar”i, “O‘zbekiston akademiklari” nomli kitoblari va uning rahbarligi ostida “Zaxiriddin Muhammad Bobur ensiklopediyasi” va gazeta va jurnallarda chop etilgan maqolalar taqdim etilgan.

Konferensiya ishtirokchilari undan katta taassurot oldilar va O‘zbekiston Milliy kutubxonasiga tashkil etilgan tadbir uchun minnatdorchilik bildirdilar.