2016 yil 15 yanvar kuni O‘zbekiston Milliy kutubxonasida O‘zbekistonda xizmat ko‘rsatgan fan arbobi, adabiyotshunos olim, filologiya fanlari doktori, professor Umarali Normatov tavalludining 85 yilligiga bag‘ishlangan “Allomaning saboqlari” mavzusida davra suhbati bo‘lib o‘tdi. Tadbirda O‘zbekiston Yozuvchilar uyushmasi a’zolari, tilshunos olimlar, adabiyotshunoslar, adiblar va kutubxona foydalanuvchilari ishtirok etdilar. 

Davra suhbatida ustoz olimningmaslakdosh do‘stlari, shogirdlari va oila a’zolari so‘zga chiqib, uning ilmiy va insoniy xislatlarini e’tirof etishdi, o‘zbek adabiy tanqidi an’analarini mahorat bilan davom etib kelayotgan zabardast olimning asarlari, maqola va esselari, zamonaviy adabiy jarayon hamda yangi o‘zbek adabiyoti tarixi, taraqqiyoti masalalariga bag‘ishlangan uning qalamiga mansub milliy adabiyotimizning nodir asarlari tahlili, o‘ziga xos talqini, bu adabiyotning o‘nlab namoyandalari adabiy portretlari, yangi o‘zbek adabiyotining o‘ziga xos xususiyatlari, taraqqiyot tamoyillariga oid ilmiy-nazariy ishlarining axamiyati haqida gapirdilar.

Davra suhbati doirasida munaqqidning qalamiga mansub adabiyotlarning ochiq ko‘rgazmasi bo‘lib o‘tdi. Unda olimning “Ijod sehri”, “Nasrimiz ufqlari”, “Yetuklik”, “Qalb inqilobi”, “Qodiriy bog‘i”, “Umidbaxsh tamoyillar”, “Tafakkur yog‘dusi”, “Qahhorni anglash mashaqqati», «Ko‘ngillarga ko‘chgan she’riyat», «Ustoz ibrati», «Ijod sexri» kitoblari va “Til va adabiyot ta’limi” va “Tafakkur” jurnallarida chop etilgan yuzlab adabiy-tanqidiy maqolalari o‘rin olgan.