08.01.2016

 2016 yil 8 yanvar kuni O'zbekiston Milliy kutubxonasining “Kashfiyot” zalida tarixiy janrda ijod qilib, zamondoshlarimizni ajdodlarimiz: buyuk olimlar, madaniyat va san'at namoyondalari bilan tanishtirgan O'zbekiston xalq rassomi, O'zbekiston BA akademigi, O'zbekistonda xizmat ko'rsatgan san'at arbobi, professor Malik Nabiev tavalludining 100 yilligiga bag'ishlangan “Zabardast musavvir” deb nomlangan kitob-rasmli ko'rgazma ochildi.

Malik Nabiev 1916 yilda Toshkentda tug'ilgan. 1937 yili P. Benkov nomidagi Respublika rassomlik bilim yurtida o'qituvchilik faoliyatini boshlagan. 1958 yildan umrining oxiriga qadar Nabiev Nizomiy nomidagi Toshkent Davlat pedagogika universitetida iqtidorli yoshlarning bir nechta avlodini tasviriy san'at sohasi sir-asrorlari bilan yaqindan tanishtirgan. U buyuk tarixiy shaxslar va fidoiy zamondoshlar aks ettirilgan asarlarni yaratdi. “Buyuk sarkarda Amir Temur”, “Spitamen”, “Beruniy portreti”, “Tamara Xonim”, “Cho'pon”, “Shifokor Mahmudova portreti”, “Quruvchi” kabi kartinalari shular jumlasidandir. Malik Nabiev o'zbek xalqining buyuk tarixiy shaxslari – Amir Temur, Kamoliddin Behzod, Bobur, Fitrat, Usmon Nosir singarilarning o'ziga xos siymolarini yaratdi, bu esa mamlakatimiz madaniy hayoti rivojida katta hodisa bo'ldi.

Ko'rgazmada Malik Nabiekning hayoti va ijodi bilan tanishtiruvchi kitoblar, uning faoliyati haqida hikoya qiluvchi davriy matbuot sahifalarida chop etilgan maqolalar va M.Nabiev mo'yqalamiga mansub rasmlarning foto suratlari joy olgan.