Foydali resurslar
2016 yil 7 yanvar kuni O‘zbekiston Milliy kutubxonasida U.Shekspirning “Gamlet” asari asosida kitobxonlar klubining adabiy kechasi bo‘lib o‘tdi. Britaniya kengashi bilan hamkorlikda o‘tkazilgan uchrashuvni Toshkent shahridagi Xalqaro vestminster universiteti o‘qituvchisi Rozaliya Ziryanova olib bordi.

Tadbir avvalida boshlovchi ishtirokchilar bilan o‘zlarini ingliz tilida tanishtiruvchi o‘yin o‘tkazdi, unda kitobxonlar “Gamlet” fojiasini qachon va qayerda o‘qiganliklarini gapirib berdilar. R. Ziryanova fojia tafsilotlariga dahldor savollar bilan murojaat qildi va kitobxonlar klubi a’zolarining mazkur asar bilan qay darajada tanishganliklarini aniqladi. Ishtirokchilarning bu asar haqidagi fikrlari, ularning asar qahramonlariga qanday munosabatda ekanliklari so‘raldi. So‘ngra fojiada keltirilgan obrazlar muhokama etildi va asardan U.Shekspir tomonidan ularga berilgan xarakteristikaga murojaat etildi. Kitobxonlar klubi a’zolari ingliz tilida tarqatilgan she’riy parchalarni o‘z ona tillariga tarjima qildilar va ularni rollarda ijro etdilar.

Tadbir so‘ngida U.Shekspirning “Gamlet” fojiasi asosida turli yillarda va turli kinostudiyalarda suratga olingan besh filmdan parchalar namoyish etildi.