31 dekabr - 3 yanvar kunlari O‘zbekiston Milliy kutubxonasi “Ijod” zalida O‘zbekiston xalq artisti, aktyor Abror Hidoyatov tavalludining 115 yilligiga bag‘ishlangan “O‘zbek Otellosi” nomli kitob-rasmli ko‘rgazma ochildi. Ko‘rgazmada taqdim etilgan kitoblar va fotosuratlar o‘zbek xalqining mashhur va fidoiy, hayotining katta qismi teatr bilan bog‘liq bo‘lgan aktyorning hayotiy va ijodiy yo‘li haqida hikoya qiladi. Jahon teatr dunyosida Abror Hidoyatov o‘zbek sahnasida Otello va Gamletni o‘ynagan aktyor sifitida tanish.

Abror Hidoyatovning yaratgan qator obrazlari orasidan uning teatr sahnasida erishgan mavqeidagi  Otello(“Otello” U. Shekspir), Gamletni(“Gamlet” U. Shekspir) va Alisher Navoiy (“Alisher Navoiy” Uyg‘un va I.Sulton) eng mashhur hisoblanib, uni teatr shinavandalarining e’tirofiga sazavor etdi. 

Ko‘rgazmadan joy olgan “O‘zbek teatri an’analari”, “Sahna va zamon”, “Istiqlol va milliy teatr”, “O‘zbekiston teatrlari” kitoblari o‘zbek teatr san’atining paydo bo‘lishi va uning fidoiy darg‘alari haqida hikoya qiladi. “Abror Hidoyatov” deb nomlangan kitob esa ko‘rgazmaga tashrif buyurgan yosh avlod vakillarini buyuk sahna ustasi hayoti bilan tanishtiradi.