2015 yil 25 dekabr kuni O'zbekiston Milliy kutubxonasi kichik majlislar zalida “Davlat hokimiyati va boshqaruvi organlari faoliyatining ochiqligi to'g'risida”gi O'zbekiston Respublikasi VM 369-sonli Qarori ijrosini ta'minlash va foydalanuvchilar bilan o'zaro muloqot o'rnatish, ularga kutubxona faoliyati, bu erdagi mavjud sharoitlar, xizmat turlari va o'tkazilgan tadbirlar bilan tanishtirish, ko'rsatilayotgan xizmat sifatini baholash, muammoli jihatlarni aniqlash, foydalanuvchilarning kutubxona haqidagi fikr va mulohazalarini tinglash va 2016 yil uchun istiqboldagi vazifalarni belgilab olish maqsadida kutubxona foydalanuvchilari bilan ochiq muloqot bo'lib o'tdi. Uchrashuvda Milliy kutubxona rahbarlari, xodimlari va foydalanuvchilar ishtirok etdilar.

Uchrashuvda 2015 yilda erishilgan natijalar sarhisob etildi, kutubxona faoliyati bilan bog'liq ijobiy dalillar keltirildi. Bugungi kunda kutubxona fondning umumiy soni – 7,1 mln.ga yaqin nusxani tashkil etadi. O'zbekiston Milliy kutubxonasida 329 ta ma'naviy-marifiy tadbirlar o'tkazildi. Shular jumlasidan, 94ta O'zbekistonning muhim va unutilmas sanalariga bag'ishlangan mavzuli va shaxsga oid ko'rgazmalar, 37 ta “Milliy kutubxonaga kelib tushgan yangi nashrlar” ko'rgazmalari; 21ta rasmlar va amaliy san'at asarlari ko'rgazmasi; 103ta turli muassasa va tashkilotlar bilan hamkorlikda o'tkazilgan ijtimoiy-madaniy tadbirlar bo'lib o'tdi.

Ochiq muloqot doirasida kutubxonada yosh avlod vakillari bioan uchrashuvlar tashkil etish, o'qish zallari ish soatlarini uzaytirish, tungi soatlarda ham xizmat ko'rsatishni yo'lga qo'yish, notiqlik san'ati va ijtimoiy yo'nalish fanlari bo'yicha o'quv guruhlarini tashkil etish, o'qish zallarining iqlim sharoitlarini yaxshilash masalalari muhokama qilindi. 

O'zbekiston Milliy kutubxonasi qoshidagi chet tillarni rivojlantirish va ommalashtirish “YS” Markazi rahbari M.Rihsiboev Markaz va ko'ngillilar tomonidan ta'lim va madaniy-ommaviy yo'nalishda amalga oshirilgan ishlar haqida hisobot berdi.

Muloqot qatnashchilari shu kabi uchrashuvlarni tashkil etilishi kutubxona foydalanuvchilariga xizmat ko'rsatishda yuzaga keladigan ba'zi muammolarni hal etishda, kutubxona faoliyati va o'zaro hamkorlikda samara berishiga amin bo'ldilar.

Oldin      Keyin