2015 yil 23 dekabr kuni O‘zbekiston Milliy kutubxonasida O‘zbekiston xalq yozuvchisi, atoqli shoir, nosir va mohir tarjimon sifatida o‘zbek madaniyati taraqqiyotiga katta hissa qo‘shgan Asqad Muxtor tavalludining 95 yilligi munosabati bilan “Bo‘ronlarda bordek halovat” mavzusida bibliografik obzor bo‘lib o‘tdi. Unda Uchtepa tuman milliy xunarmandchilik kasb xunar kolledji o‘quvchilari va kutubxona foydalanuvchilari ishtirok etdilar. 

Tadbir boshlovchisi O‘zbekiston yozuvchilar uyushmasi a’zosi, shoir Shukur Qurbon Asqad Muxtor hayoti va ijodi bilan yig‘ilganlarni yaqindan tanishtirdi. Asqad Muxtor 1920 yilda Farg‘ona shahrida tug‘ilgan. O‘rta Osiyo Davlat universitetini tamomlagach Andijon pedagogika institutida o‘zbek adabiyoti kafedrasining mudiri, so‘ngra esa respublika markaziy gazetalarining tahririyatlarida bo‘lim mudiri, mas’ul kotib, «Sharq yulduzi» jurnalida bosh muharrir, «Guliston» jurnali va «O‘zbekiston adabiyoti va san’ati» haftaligiga muharrir bo‘lib ishlaydi. Uning ijod namunalari 1938 yildan boshlab davriy matbuotda chop etila boshlandi. Adib o‘z asarlarida jamiyat hayotiga o‘z faol ishtiroki bilan katta hissa qo‘shayotgan yoshlar, ona Vatan go‘zalliklarini, tuganmas boyliklarini, xalq hayotidagi katta o‘zgarishlarni, oilalar va xalq taqdirini badiiy tasvirlagan. U qator adabiy tanqidiy maqolalar muallifi hamdir. Uning sayi harakatlari bilan o‘zbek kitobxonlari A. S. Pushkin, M. Yu. Lermontov, M. Gorkiy, V. V. Mayakovskiy, A. A. Blok, T. G. Shevchenko va Safokl asarlari bilan tanishdilar.

Shuningdek, boshlovchi Asqad Muxtorning o‘zining «Tilak»,  «Tong edi»,  «Totli damlar» singari ilk she’rlarida poeziyaning maqsad va vazifasini axtargani, shoirning jamiyat oldidagi burchini aniklab   olishga  intilishlari, «Daryolar tutashgan joyda», «Qoraqalpoq qissasi», «Buxoroning jin ko‘chalari» kabi qissalarida, «Opa-singillar» «Davr mening taqdirimda», «Chinor» kabi romanlarida zamonamizning muhim muammolarini ifodalashga bo‘lgan urinishlari, xalq taqdirini bir oila misolida tasvirlagani va bu asarlarning tez fursatda kitob javonlaridan joy olgani haqida hikoya qilib berdi.