2015 yil 22 dekabr kuni O‘zbekiston Milliy kutubxonasida O‘zbekistondagi Koreya Respublikasi elchixonasi bilan hamkorlikda tashkil etilgan «Korean Animation Day-2015» tadbiri bo‘lib o‘tdi. Unda “Koreyaga yo‘l” o‘qish zalining doimiy foydalanuvchilari va kutubxonaning mazkur tadbirga qiziqqan  barcha foydalanuvchilari ishtirok etishdi.

Tadbirning ochilish marosimida O‘zbekistondagi Koreys ta’lim markazi direktori Kim Bum Su nutq so‘zladi. O‘z nutqida u o‘zbek-koreys munosabatlarining  nafaqat iqtisodiy sohada, balki madaniy aloqalarning ham mustaxkamlanib borayotgani e’tirof etdi. “Buninig tasdig‘i sifatida O‘zbekiston va koreya Milliy kutubxonalari o‘rtasida o‘rnatilgan hamkorlik, O‘zbekiston Milliy kutubxonasida “Koreyaga yo‘l” o‘qish zalining ochilishi va shu yerda o‘tkazilayotgan ko‘plab madaniy tadbirlarni tashkil etilishini keltirishimiz mumkin”, dedi u va “Dovyurak Lifi” multfilmining yaratilish g‘oyasi, koreys bolalari tomonidan kutib olinganligi va uning tarbiyaviy ahamiyati haqida so‘zladi.

Tadbir doirasida Koreya Respublikasi animalistlari (rejissyor Son Yun Ox, ssenariy muallifi Endjeni Kim) tomonidan suratga olingan “Dovyurak Lifi” deb nomlangan multfilmi namoyish etildi. 

Bu koreys xalq ertagining animatsion ko‘rinishi. “Dovyurak Lifi” multfilmi ijodkorlari uni yorqin va qiziqarli qilishga harakat qildilar. U barchaga: kattalarga va kichik yoshdagilarga manzur bo‘lishi shubhasiz, chunki u oila davrasida ko‘rishga mo‘ljallangandir.

“Dovyurak Lifi” multfilmi mazmuni: Lifi ismli tovuq o‘rmonga qochib ketadi va u yerda kichik o‘rdakchani qutqarib qoladi. O‘rdakchaning boradigan yeri bo‘lmagani uchun Lifi uni o‘zi bilan olidi. O‘rmonda ular turli kutilmagan voqealar va qiziqarli sarguzashtlarni boshdan kechiradilar.   

Tadbir ishtirokchilari tashkilotchilarga koreys multiplikatsiya  namunasi bilan tanishish imkoni yaratilgani uchun minnatdorchilik bildirdilar.