O‘zbekiston Milliy kutubxonasining “Ijod” musiqiy zalida  buyuk nemis kompozitori Lyudvig van Betxoven ijodiga bag‘ishlangan “Buyuk va mashhur” nomli ko‘rgazma ochildi.

Lyudvig van Betxoven 1770 yilda Bonnda saroy kapellasi xonandasi xonadonida tavallud topdi. U yaratgan musiqa 2 asrdan buyon tinglovchilar qalbini junbishga keltirmoqda. Ma’rifat davri namoyondasi, nemis klassik musiqasi va falsafasi vakili, pianinochi, direjyor Lyudvig van Betxoven o‘z asarlarida insoniyatning erkinlik va baxt to‘g‘risidagi asriy orzusini tarannum etdi. Uning ijodi qahramonlik, yuksak g‘oyalar va obrazlar, kuchli dramatizm va ulkan emotsional kuchga ega. Uning mukammal asarlarida insonparvarlik, ma’naviy boylik, donolik va insoniylik mujassam. O‘z fikrlarini va xissiyotlarini yetkazish uchun u hamisha an’anaviy musiqa janrlari bilan boyitilgan toza, yorqin notalarni topar edi. Betxovenning “To‘qqizinchi simfoniyasi” insonni ozodlikka da’vat etib, yaxshilikning yovuzlik ustidan g‘alabasiga ishonch uyg‘otsa, “Oy sonatasi” muallifning javobsiz muhabbatiga qo‘yilgan haykal hisoblanadi. Betxoven asarlarining mohir ijrochisi, pianinochi, uning suyukli shogirdiga atalgan “K Elize” deb nomlangan mashhur fortepiano pesasi esa jahon musiqasining eng mashhur asarlari sirasiga kiradi. 

Ko‘rgazmada  Lyudvig van Betxovenning hayoti va ijodi haqida ma’lumot beruvchi adabiyotlar va uning “Chetыre irlandskie pesni”, “Konsert №№4,5 dlya fortepiano s orkestrom”, “Sonata №8 dlya skripki s fortepiano”, “Kvartetы №№ 7-9. Partitura”, “Izbrannыe pesni”, “Milee vsex bil Djemmi” kabi nota nashrlari, shuningdek mashhur kompozitorning kelib chiqishi, ta’limi, do‘stona aloqalari, maslakdoshlari bilan o‘zaro aloqalari, ruhiy kechinmalari va xastaliklari haqida hikoya qiluvchi “Betxoven xotiralari. Biografik qaydlar” deb nomlangan xotira kitobi namoyish etilgan. 

Ko‘rgazmaga tashrif buyurganlar Betxoven asarlarining dunyoga kelish tarixi bilan yaqindan tanishdilar.