Ilmiy-amaliy anjumanni ochiq deb e’lon qilar ekan, Inson huquqlari bo‘yicha o‘zbekiston Respublikasi Milliy markazi direktori A.Saidov Suyun Qoraevning fanning geografiya, geografik atamashunoslik, toponimika, tilshunoslik, publitsistika va boshqa yo‘nalishlariga qo‘shgan xissasini e’tirof etib, “Umrining 70 yilini ilm-fan rivoji yo‘liga baxshida etgan  Suyun Qoraev geografiya, geografik atamashunoslik, toponimika, tilshunoslik, ekologiya, etimologiya va onomastika sohasida  350ta ilmiy ishlar, 30ta kitob va risolalar yaratdi. Uning tarixiy-geografik tadqiqotlari natijasida ilm-fanimiz o‘z etimologiyasiga ega bo‘lgan 2000dan ziyod toponimlar bilan boyitildi”, dedi.

O‘zbekiston Respublikasi Yer resurslari, geodeziya, kartografiya va davlat kadastri davlat ko‘mitasi direktori S.Arabov Suyun Qoraevning kamtarinlik va halollik,  to‘g‘riso‘zlik va samimiylik, ilm fan cho‘qqilarini egallashga shijoat va intilishlariga alohida urg‘u berib, “Unda barcha insoniylik xislatlar, fanga fidoiylik va qiyinchiliklar oldida sobit qadamlik barchamiz uchun ibrat bo‘la oladigan darajada mujassamdir”, dedi. 

Konferensiyada so‘zga chiqqanlar professor Suyun Qoraevni 90 yillik ayyomi bilan muborakbod etdilar, uning nafaqat ilm-fan rivojidagi, balki o‘zbek va qirg‘iz xalqlarining do‘stona munosabatlari, ularning madaniy va adabiy aloqalarini mustaxkamlashda muhim o‘rin egallagan tarjimonlik va publitsistik faoliyatiga to‘xtaldilar.

Ilmiy-amaliy konferensiyada professor Suyun Qoraevning ilmiy ishlari, tadqiqotlari, kitoblari, publitsistik va adabiy tarjimalari, shuningdek, davriy nashrlarda chop etilgan maqolalari ko‘rgazmasi namoyish etildi.

O‘zbekiston Milliy kutubxonasi matbuot xizmati