Tadbirda so‘zga chiqqanlar teatr sahnasida Hamza Umarov bilan biraglikda o‘ynagan spektakllari va ijodiy hamkorlik jarayonida olgan o‘gitlari haqida so‘zlab berdilar. O‘zbekiston xalq artisti Naima Po‘latova O‘zbekiston milliy kutubxonasiga buyuk teatr darg‘asi Xamza Umarovga ko‘rsatilgan e’tibor uchun minnatdorchilik bildirdi va bir necha yillar davomida birgalikda o‘ynagan spektakllarini xotirladi. O‘zbekistonda xizmat ko‘rsatgan artist D.Safaeva esa shogirdlar tomonidan e’tirof etilgan ustoz san’atkorning adolatparvarligi, talabchanligi, haqiqatgo‘yligi va mehribonligini ta’kidladi va H.Umarov bilan birgalikda o‘ynagan “Gulsara” va “O‘jarlar” spektakllaridan ashulalar kuylab berdi.

O‘zbekistonda xizmat ko‘rsatgan artist T.Beknazarov yig‘ilganlarga H.Umarov bilan repititsiyalar jarayonida sodir bo‘lgan kulguli va ibratomuz voqealar haqiga gapirib berdi. “Hamza Umarovning o‘gitlari bizni akter bo‘lib shakllanishimizda yordam bergani kabi biz ham ular yordamida o‘z shogirdlarimizni san’at yo‘liga boshlaymiz. Uning ijodi serqirra edi. H.Umarov filmlarni dublyaj qilishda ham faol qatnashib, mingga yaqin qahramonlarga o‘zbek tilida ovoz bergan”.

Teatrning adabiy emakdoshi T.Mirzo tug‘ma iste’dod sohibi, dublyaj ustasi va tajribali ustoz  H.Umarov xotirasiga bag‘ishlagan “Xamza Umarov armoni” she’rini o‘qib berdi. Dramaturg X.Rasulov esa uning yozuvchilik va rejissyorlik mahoratiga baho berdi. “H.Umarov nafaqat aktyor, balki O‘zbekiston teatr sahnalarida sahnalashtirgan "Bag‘ri tosh", "Qaynona", "Ishqing bilan" kabi spektakllarning rejissyori, "Bag‘ri tosh", "Hayot yo‘li", "Dil tortsa", "Yor yurgan ko‘chalar", "Tong farzandlari" pesalarining muallifi hamdir,”dedi u.
Shuningdek, O‘zbekiston Milliy kutubxonasida “Sahnada yashagan inson” nomli kitob-rasmli ko‘rgazma ochildi. Unda aktyor hayoti va ijodini yorituvchi kitoblar, maqolalar va rasmlar o‘rin oldi.

O`bekiston Milliy Kutubxonasi matbuot xizmati