2015 yil 16 dekabr kuni O‘zbekiston Milliy kutubxonasida O‘zbekiston xalq artisti, opera qo‘shiqlari ijrochisi Saodat Qobulova tavalludining 90 yilligiga bag‘ishlangan “Benazir ovoz sohibasi” nomli xotira kechasi bo‘lib o‘tdi. Tadbirda A.Navoiy nomidagi DAKT artistlari, O‘zbekiston davlat konservatoriyasi, O‘zbek davlat san’at va madaniyat instituti, Nizomiy nomidagi Toshkent davlat pedagogika universiteti professor-o‘qituvchilari, talabalari va kutubxona foydalanuvchilari ishtirok etdilar.

Tadbirni ochiq deb e’lon qilar ekan, O‘zbekiston Milliy kutubxonasi direktor o‘rinbosari U.Teshabaeva o‘sib kelayotgan yosh avlodning ma’naviy va axloqiy tarbiyasida O‘zbekiston Milliy kutubxonasi rolini e’tirof etdi va kecha ishtirokchilarini Saodat Qobulova hayoti va musiqiy merosi bilan tanishtirdi. 

O‘zbekiston xalq artisti, O‘zbekiston davlat konservatoriyasi “Akademik xonandalik va opera tayyorgarligi” kafedrasi mudiri, professor Muyassar Razzoqova tadbir tashkilotchilariga Saodat Qobulovaga ko‘rsatilgan e’tibor va uning san’atiga bo‘lgan qiziqish uchun minnatdorchilik bildirdi, o‘zbek milliy opera sahnalariga o‘nlab shogirdlarni tayyorlagan ustozi gavdalantirgan yorqin obrazlar haqida so‘zlab berdi va “Saodat Qobulova yosh iste’dod egalarini darhol aniqlab, ularni o‘z misolida to‘g‘ri yo‘naltira olar edilar.  U ijro etgan o‘zbek musiqa merosi va milliy ashula san’atining asl namunalari hamon o‘z qadr-qimmatini yo‘qotmay, san’at muxlislariga zavq-shavq bag‘ishlab kelmoqda”, dedi.

S.Qobulovaning qizi opera xonandasi, O‘zbekiston davlat konservatoriyasi o‘qituvchisi Nodira Qobulova esa S.Qobulovaning ona, unda opera musiqasiga mehr uyg‘otgan inson va o‘z pedegogik mahoratiga ega serqirra ijodkor sifatida o‘z xotiralari bilan o‘rtoqlashdi.   

Benazir ovoz sohibasi Saodat Qobulovaga bag‘ishlangan xotira kechasida O‘zbekiston davlat konservatoriyasi talabalari, respublika va xalqaro tanlovlar g‘oliblari B.Baxtiyorov, X.Sodiqova, H.Rahmatova, A.Ismagilova, S.Berdievlar ustoz san’atkorning ijodiga mansub operalardan ariyalar kuylab xotira kechasi ishtirokchilarida katta taassurot qoldirdilar.