2015 yil 15 dekabr kuni O‘zbekiston Milliy kutubxonasida O‘zbekiston Respublikasi adliya vazirligi, Inson huquqlari bo‘yicha O‘zbekiston Respublikasi milliy markazi, Toshkent davlat yuridik universiteti va uning qoshidagi akademik litsey bilan hamkorlikda “Konstitutsiya va barkamol jamiyat orzusi” mavzusida ilmiy-amaliy konferensiya bo‘lib o‘tdi.  

Ilmiy-amaliy konferensiyada huquqshunoslar, huquqni muxofaza qiluvchi organlar vakillari, TDYuU professor-o‘qituvchilari, magistrantlari va talabalari, shuningdek, akademik litsey o‘quvchilari ishtirok etdilar. Anjumanda yosh avlodning huquqiy savodxonligini oshirish va huquqiy madaniyatini yuksaltirishga qaratilgan dolzarb muammolar muhokama qilindi.

O‘zbekiston Respublikasi Konstitutsiyasi, yoshlar huquqi, huquqiy va yuqori malakali mutaxassislarni tayyorlashda ijtimoiy fanlarning o‘rni, inson huquqlarini ta’minlash masalalari haqida ma’ruza qilganlar barkamol avlodning ta’lim jarayonini to‘g‘ri shakllantirish, bo‘sh vaqtini samarali tashkil etish, ularning ijtimoiy faolligini oshirish muhimligini ta’kidladilar. Shuningdek, anjuman ishtirokchilari yoshlarni tashvishga solayotgan muhim masalalar haqida ham suhbatlashdilar.

Anjumanda muhokama qilingan masalalar, tajribali pedagoglar, yosh tadqiqotchtlar va iqtidorli yoshlarning ilmiy-amaliy izlanishlari va metodik tavsiyalari konferensiya ma’ruzalari to‘plamida chop etildi. To‘plam materiallari huquq sohasi mutaxassislari, o‘qituvchilar va tadqiqotchilar, OO‘Yu talabalari, kollej va litseylarning huquqshunoslik yo‘nalishi o‘quvchilari uchun mo‘ljallangan.