O‘zbekiston Milliy kutubxonasi fondi 2015 yilda “Farg‘ona” nashriyotida chop etilgan, 2 jildli Farg‘ona davlat universiteti to‘g‘risidagi nashr bilan boyitildi. Kitob respublikamizning to‘ng‘ich oliy o‘quv yurtlaridan biri bo‘lgan Farg‘ona davlat universitetining tarixiy ildizlari, sharafli yo‘li, ilmiy faoliyatidagi yuksalish bosqichlariga bag‘ishlangan.  

Kitobning birinchi jildida Farg‘ona davlat universitetining tashkil topishi tarixi, universitetning istiqlol yillaridagi faoliyati haqida hikoya qilinadi. 1930 yilda tashkil etilgan mazkur ma’rifat maskani o‘z davrida O‘zbekiston xalq xo‘jaligini yuqori malakali o‘qituvchilar, agronomlar, injenerlar va shifokorlar bilan ta’minlashni o‘z maqsadida tashkil etilgan olgan bo‘lib uning 2 bo‘limda 120 nafar talaba tahsil olar edi.  Bugungi kunda bu yegrdagi 9ta fakultetda  531 nafar yuqori malakali professor-o‘qituvchilar, shular jumlasidan, 30 nafar fan doktorlari va professorlar va 149 nafar fan nomzodlari va dotsentlar ta’lim beradilar. Bakalavriatning 33 yo‘nalishda olti mingdan ziyod talaba va magistraturaning 14 yo‘nalishida 150 dan ziyod magistrantlar tahsil oladilar.

Majmua kitobxonlarni universitet fakultetlari, markazlari, kafedralari, bo‘limlari va jamoa tashkilotlari bilan tanishtiradi. Bu yerda shuningdek, taniqli yozuvchi va shoirlar, madaniyat arboblari va jurnalistlar, sobiq talabalarining universitetning qutlug‘ yoshi bilan tabrigi, talabalik yillari xotiralari, universitetga bag‘ishlangan she’rlari va tilaklari o‘rin olgan.

Kitobning ikkinchi qismida turli yillarda oliygohning rahbarlik lavozimlarida faoliyat olib borgan ustoz olimlar, O‘zbekistonda ilm-fan va ma’rifat rivojiga salmoqli xissalarini qo‘shgan, shu ziyo maskanida uzoq yillar samarali xizmat qilib, o‘z mehnati, ilmiy-ijodiy faoliyati, mehr-muhabbatini har tomonlama yetuk insonlarni komol topishiga bag‘ishlagan va hozirgi kunda ham bag‘ishlayotgan fidoiy professor-o‘qituvchilar to‘g‘risida bibliografik ma’lumotlar keltirilgan. 

Kitob ijodkorlari uning yaratilishida bosma nashrlarga, tarixiy adabiyotlarga, arxiv hujjatlariga, universitet nashriyoti materiallariga, marhum professor-o‘qituvchilar oila a’zolarining, bugungi kunda mehnat qilayotgan professor-o‘qituvchilar va talabalarning xotiralariga tayandilar. Kitob universitet xayoti va professor-o‘qituvchilari faoliyati bilan tanishtiruvchi suratlarga boy.