2015 yil 9 dekabr kuni O‘zbekiston Milliy kutubxonasida Nogironlar kuniga bag‘ishlangan musiqiy kecha bo‘lib o‘tdi. Tadbir Boshqird-tatar milliy madaniyat markazining “Agidel” klubi tomonidan tashkil etildi. Tadbir doirasida musiqiy konsert, I guruh nogironi rassom Hudoyshukur Radjapovning rasmlari ko‘rgazmasi, shuningdek, Toshkent sh. MPA bosh treneri, xizmat ko‘rsatgan sport ustasi Rashid Safaralievning O‘zbekiston paralimpiya jamoasi a’zolari, Jahon va Osiyo chempionatlari sovrindorlarining kundalik hayoti va g‘alaba onlari muhrlangan fotosuratlari ko‘rgazmasi bo‘lib o‘tdi.

Konsert dasturini ochiq deb e’lon qilar ekan, “Agidel” klubi badiiy rahbari E.Magiyarova, paralimpiya jamoasi a’zolarini qutladi, ularning sportdagi yutuqlarini e’tirof etdi va ularga sog‘lik, xotirjamlik va sportda ulkan zafarlar tiladi. 

Musiqiy kechada “Agidel” klubi ishtirokchilari boshqird xalq qo‘shiqlari va raqslarini ijro etdilar, o‘z ijodlariga mansub she’rlar o‘qidilar. Kechada, shuningdek, yahudiy milliy madaniyat markazining “Legava” (“Qalb otashi”) raqs jamoasi va Chirchiq sh. 9-umumta’lim maktabi raqs jamoasi ishtirok etdilar.