2015 yil 3 dekabr kuni O‘zbekiston Milliy kutubxonasida O‘zbekiston XDP Toshkent shahar kengashi “Istiqbol” yoshlar qanoti tomonidan O‘zbekiston Respublikasi Konstitutsiyasi qabul qilinganining 23 yilligi munosabati bilan “Konstitutsiya bilimdoni” ko‘rik-tanlovi bo‘lib o‘tdi. Tanlovni o‘tkazishdan maqsad – yoshlar o‘rtasida Konstitutsiya g‘oyalarining mazmun-mohiyatini targ‘ib qilish, yoshlarning huquqiy va siyosiy madaniyatini oshirish, shuningdek, yosh avlodni milliy qonunchiligimiz faoliyatiga doir axborot bilan tanishtirib borish.  

Tanlovda besh guruh – O‘zbekiston Respublikasi VM huzuridagi Toshkent islom universiteti, Abu Rayxon Beruniy nomidagi Toshkent davlat texnika universiteti, Toshkent davlat sharqshunoslik instituti, O‘zbekiston davlat jahon tillari universiteti va Mirzo Ulug‘bek nomidagi O‘zbekiston milliy universiteti jamoalari kuch sinashdilar.

 Ularning uchta shart bo‘yicha bilimlarini huquqshunoslik, yurisprudensiya, tarix va sotsiologiya sohasining yetuk mutaxissislaridan iborat hakamlar hayyati baholab bordi. Ular o‘z qo‘ygan baholarini sharhlab, ishtirokchilar yo‘l qo‘yilgan hatolarini ko‘rsatib, ularning yutuqlarni alohida qayd etib bordilar.

Tanlovning 1-sharti bo‘yicha ishtirokchilar O‘zbekiston Respublikasi Konstitutsiyasi moddalari bo‘yicha tuzilgan test topshiriqlarini bajargan bo‘lsalar, 2-shartda ular o‘z notiqlik mahoratlarini namoyish barobarida topqirlik, bilimdonlik va hozirjavoblik qobiliyatlarini ham isbotladilar. 3-shartda jamoaning eng zukko a’zolari tezkor savol-javobda o‘z o‘quv yurtlari sha’nini himoya qildilar. 

Tanlov natijalariga ko‘ra eng ko‘p ball to‘plagan jamoa g‘olib deb topildi. Bu Mirzo Ulug‘bek nomidagi O‘zbekiston milliy universiteti jamoasi bo‘ldi. 2-o‘rin Toshkent davlat sharqshunoslik instituti jamoasiga, 3-o‘rin esa Toshkent islom universiteti jamoasiga nasib etdi. G‘olib jamoalar 1, 2 va 3-darajali diplomlar bilan taqdirlandilar. Shuningdek, barcha ishtirokchilarga O‘zbekiston XDPning esdalik sovg‘alari topshirildi.