2015 yil 2 dekabr kuni O‘zbekiston Milliy kutubxonasida O‘zbekiston Respublikasi Konstitutsiyasining 23 yilligi munosabati bilan “Baxtimiz qomusi” nomli davra-suhbati bo‘lib o‘tdi. Tadbirda jamoat tashkilotlari vakillari, Toshkent Tibbiyot akademiyasi huzuridagi harbiy-tibbiy fakulteti o‘qituvchilari va kursantlari va kutubxona foydalanuvchilari ishtirok etdilar.

Tadbirda so‘zga chiqqanlar, TDYuU “Davlat qurilishi va boshqaruvi” kafedrasi o‘qituvchisi Dilshod Rajabov, al-Buxoriy xalqaro fondi rahbari, f.f.d., professor Baxtiyor To‘raev, f.f.d., professor Baxtiyor Karimovlar Konstitutsiyamiz davlat xalq irodasini ifoda etishini, uning manfaatlariga xizmat qilishini, davlat hokimiyatining birdan bir manbai O‘zbekiston xalqi ekanligini, inson, uning hayoti, erkinligi, sha’ni, qadr-qimmati va boshqa daxlsiz huquqlari oliy qadriyat hisoblanishini belgilab berganligini yana bir bor ta’kidladilar.

Tadbir avvalida mamlakatimiz rivojida uning barcha sohalarini chuqur isloh etish bo‘yicha ishlab chiqilgan konsepsiya hayotga tatbiq qilinayotganligi va isloh etish masalalariga alohida ahamiyat berilayotganligi haqidagi “O‘zbekiston Respublikasi Konstitutsiyasi –islohotlar asosi” nomli hujjatli film namoyish etildi.

TDYuU “Davlat qurilishi va boshqaruvi” kafedrasi o‘qituvchisi Dilshod Rajabov O‘zbekiston Respublikasi Konstitutsiyaning alohida e’tiborga loyiq, o‘zbek xalqining milliy nuqtai nazarini, ahloqiy tamoillarini, mentaliteti va tarbiyasini ta’riflovchi moddalari haqida gapirdi. “Ota-onalar haqida g‘amho‘rlik qilish – farzandlarning asosiy majburiyatlaridan biridir. O‘zbekiston Respublikasi Konstitutsiyasiga muvofiq balog‘at voyaga yetgan, mehnatga layoqatli farzandlar o‘z ota-onalari haqida g‘amxo‘rlik qilishga majburdirlar”, dedi u. Al-Buxoriy xalqaro fondi rahbari, f.f.d., professor Baxtiyor To‘raev esa fuqarolarning O‘zbekiston Respublikasi Konstitutsiyasida belgilab berilgan majburiyatlaridan tashqari ularning huquqlari haqida so‘zladi va ularning avvalgi tahrirlar bilan qiyosladi. Shuningdek, u O‘zbekistonda istiqomat qiluvchi fuqarolarning millati, ijtimoiy kelib chiqishi, dinidan qat’iy nazar ularning milliy qadriyatlarining, o‘zbek xalqi merosining saqlanilishi qafolatlanganligi haqidagi Konstitutsiya boblaridan misollar keltirdi va o‘z-o‘zini boshqarish organlari (mahalla)ning fuqarolarning huquqiy ongini o‘stirish va siyosiy madaniyatini shakllantirishdagi roli haqida so‘zladi.

Tadbir doirasida O‘zbekiston Respublikasi Konstitutsiyasining 23 yilligiga bag‘ishlangan “Konstitutsiya – huquqimiz asosi” nomli ko‘rgazma ochildi.