2015 yil 26 noyabr kuni O‘zbekiston Milliy kutubxonasida Milan politexnika universiteti professori Lorenso Morgantining zamonaviy Italiya arxitekturasining o‘ziga xosliklariga bag‘ishlangan seminar treningi bo‘lib o‘tdi.  Tadbir Toshkent moda haftaligi doirasida bo‘lib o‘tdi.

Lorenso Morganti arxitektura tushunchasining zamonaviy talqinini ochib berdi, arxitektura yo‘nalishlari va shahar dizayni haqida hikoya qildi. O‘zi tomonidan yaratilgan eksklyuziv mehmonxonalar  intereri haqida so‘zlab berar ekan, professor Morganti ularning mehmonlar qulayligi uchun shinamliligi, arxitektonik badiiy bo‘yoqdorligining muhimligini aytib o‘tdi. “Bunday inshootlarni yaratishda har bir zamonnning o‘z arxitektura uslublari yo‘nalishini e’tiborga olish kerak”, dedi janob Morganti va Italiya modernizmi namunalari sanalmish inshootlar foto suratlarini namoyish etdi. 

Lorenso Morganti seminar ishtirokchilarini eng zamonaviy qurilish ashyolari va konstruksiyalaridan foydalanish, bezakdorlik tendensiyasidan chekinish, tarixiy elementlardan voz kechish, oynalardan keng foydalanish va yorug‘lik tushish traektoriyasini e’tiborga olish kabi talablarni o‘z ichiga olgan  hozirgi zamonaviy arxitektura modernizmi tamoillari bilan tanishtirdi. Shuningdek, u uning konsepsiyasi bo‘yicha Milanda barpo etilgan yangi Larte restorani haqida so‘zlab berdi.

Seminar ishtirokchilari zamonaviy Italiya arxitekturasi haqida qiziqarli ma’lumotlarga ega bo‘ldilar va ularni qiziktirgan barcha savollarga olgan javoblardan mamnun bshldilar.