2015 yil 20 oktabr kuni O‘zbekiston Milliy kutubxonasida O‘zbekiston  Respublikasining Davlat tili qabul qilinganligining 26 yilligiga bag‘ishlangan “Ona tili-millat ko‘zgusi” shiori ostida davra-suhbati bo‘lib o‘tdi. Tadbirda navoiyshunos olima, professor Suyuma G‘anieva, O‘zbekiston xalq artisti Afzal Rafiqov, O‘zbekiston yozuvchilari uyushmasi a’zosi, shoir Shukur Qurbon, tilshunos olim, f.f.n Zuxriddin Isomiddinov, adabiyotshunos olimlar, Toshkent Tibbiyot akademiyasi huzuridagi harbiy-tibbiy fakulteti kursantlari, P.F.Borovskiy nomidagi Toshkent tibbiyot kolleji o‘quvchilari va kutubxona foydalanuvchilari ishtirok etdilar.

Tadbirda so‘zga chiqqanlar “O‘zbekiston  Respublikasining Davlat tili to‘g‘risida”gi Qonun qabul qilinishi tarixi, unga sabab bo‘lgan omillar haqida so‘zladilar, uning o‘zbek millatining shakllanishidagi o‘rni, milliy qadriyatlarning shakllanishi, hayotimizning barcha jabhalarida amalga oshirilayotgan ulkan ishlarni e’tirof etdilar va barkamol avlod ma’naviy tarbiyasida milliy tilning ahamiyati haqida so‘zladilar.

O‘zbekiston xalq artisti Afzal Rafiqov buyuk mutafakkir va shoir Alisher Navoiyni o‘zbek adabiy tili asoschisi sifatida e’tirof etilganligini yana bir bor tilga olib, uning o‘zbek tilining o‘ziga xos tarovati, nafosati va jozibasini tarannum etgan asarlaridan namunalar keltirdi. 

Navoiyshunos olima, professor Suyuma G‘anieva o‘zbek tilining boyligi va benihoya kuchi haqida so‘zlagan nutqida uning hozirgi kunda barcha sohalarida rasmiy qo‘llanilayotgani, fan va adabiyotdagi rivoji to‘g‘risida to‘xtalib o‘tdi. S.G‘anieva: “O‘zbek tilining Davlat tili sifatida tan olinishi uning nafaqat rasmiy til, balki milliy madaniyatimizning ifodasi omili va o‘sib kelayotgan yosh avlodning o‘z ona tiliga muhabbat ruhida tabdiyalashda muhim jihat hisoblanadi”, dedi.