2015 yil 15 iyul kuni O‘zbekiston Milliy kutubxonasida kutubxona qoshida tashkil etilgan “INFOLIB”- axborot-kutubxona xabarnomasining ilk soni taqdimoti bo‘lib o‘tdi. Jurnal kutubxonaning matbaa bo‘limida chop etildi.

Taqdimotda kutubxonachilik va kitobshunoslik sohasi mutaxassislari, axborot-kutubxona muassasalari xodimlari, noshirlar, kutubxona foydalanuvchilari va OAV vakillari ishtirok etdilar.

Tadbirni ochiq deb e’lon qilar  ekan O‘zbekiston Milliy kutubxonasi direktori A.Xodjaev “INFOLIB”- axborot-kutubxona xabarnomasi tashkil etilishining O‘zbekistonda axborot-kutubxona sohasi taraqqiyotida  ehtiyoji va dolzarbligini ta’kidladi. U o‘z nutqida jurnalni tashkil etishdan maqsad –  soha mutaxassisilarini axborot-kutubxona sohasida Prezidentimiz I.A.Karimov rahnamoligida o‘tkazilayotgan islohotlarning amaliy natijasi, hukumat dasturlari va ularning amalga oshishining borishi,  sohaning me’yoriy-hujjat asosini takomillashtirish ishlari, kutubxona va kutubxonachilikka oid bo‘lgan  yurtimiz va xalqaro jabhalarda sohada amalga oshirilayotgan ilmiy va texnologik yangiliklar, kutubxona fondida saqlanayotgan nodir va qulyozma kitoblar va kitobxonlarni fondga kelib tushayotgan yangi adabiyotlar va vaqtli mutbuot nashrlari bilan tanishtirish ekanligini alohida aytib o‘tdi. Mazkur nashr yangiliklarni shakllantirish, ularni vazirlik va idoralar axborot-kutubxona muassasalarida qo‘llashga doir g‘oyalarni muhokama qilish maydoni bo‘lib xizmat qiladi.

O‘zbekiston Milliy kutubxonasi direktori o‘rinbosari A. Ishmatov o‘z taqdimotida “INFOLIB”- axborot-kutubxona xabarnomasi mohiyati haqida gapirdi va slaydlarda mazkur nashrning maqsadi, vazifalari va tuzilishini ko‘rgazmali sharhlab berdi. “Jurnalning mazkur sonidan o‘rin olgan “Minbar”, “Ushbu son mehmoni”, “Yangiliklar”, “Amaliyot”, “Me’yoriy hujjatlar”, “Meros”, “Muhim sanalar”, “Voqealar”, “Yangi adabiyotlar”, “Statistika”, “Savol-javob” kabi ruknlarda barcha kutubxonalar foydalanuvchilarga xizmat ko‘rsatishda duch keladigan savollar yoritiladi. Jurnal sahifalarida mutaxassislar sohadagi yangiliklarga, AKT rivojlanishi sharoitlarida kutubxonalar faoliyati, xalqaro hamkorlik aloqalari, milliy bibliografiyani shakllantirish an’analari, kutubxona fondlarinng boyishi, zamonaviy multimedia bazasining yaratilishi jarayoni, foydalanuvchilarga ko‘rsatilayotgan xizmatlar ko‘lamiga nisbatan fikr almashadilar, unda shuningdek, soha mutaxassislari uchun uslubiy ko‘rsatmalar ham chop etiladi,” dedi A.Ishmatov.

Taqdimotda, shuningdek, respublika ilmiy-pedagogika kutubxonasi ilmiy-uslubiy bo‘lim rahbari R.Ratner, t.f.d. E.Oxunjonov va f.f.d.   E.Umarovlar so‘zga chiqdilar. Ular O‘zbekiston Milliy kutubxonasini, axborot-kutubxona sohasi mutaxassislarini, jurnal noshirlarini va kutubxona foydalanuvchilarini soxa mutaxassislarini kasbiy huquqiy bilimlarga bo‘lgan talablarini qondiruvchi, ularni soxaga doir  yangiliklari va O‘zbekiston va xorij tajribasi  bilan tanishtiruvchi jurnalning ilk soni bilan muborakbod etdilar.