Tadbirni ochiq deb e’lon qilar ekan, O‘zbekiston Milliy kutubxonasi direktori o‘rinbosari U.Teshabaeva yig‘ilganlarni kitobning mazmuni va mohiyati bilan tanishtirdi. Taqdimotda so‘zga chiqqanlar muallif ishining mohiyatini, maqsad va vazifalarini alohida ta’kidlab, uning barkamol avlod tarbiyasida, ularda madaniy merosga egalik va kelajak avlodga yetkazish xissini tarbiyalashda tutgan o‘rni haqida gapirdilar.  T.f.d., professor M.Is’hoqov kitobda keltirilgan dalillarning aniqligini ta’kidlar ekan: “Bu kitob ko‘pyillik mehnat samrasidir va undagi barcha ma’lumotlar ilmiy tadqiq etilib o‘z isbotini topgan. Uning hozirgi kunda rus va ingliz tillariga tarjima qilinayotganligi esa dunyoda unga bo‘lgan qiziqishning ortayotganligidan darak beradi,”- dedi.

Kitobning O‘rta Osiyo xalqlari etnik jarayonining o‘sishini o‘rganishga qo‘shgan xissasiga qaratar ekan, folklorshunos olim T.Mirzaev  yig‘ilganlar e’tiborini A.Asqarovning etnogenez tarixi va etnik madaniyat taraqqiyotiga doir ilmiy taqdiqotlariga qaratdi. 

Muallif «o‘zbek milliy mentaliteti» tushunchasini ta’riflaydi va uning o‘ziga xosliklarini tadqiq etadi. Kitobda qisqartmalar, atamalar va toponimlarning ilmiy isbotlangan izohlari bilan, boblarga ajratilgan holda berilishi alohida e’tiborga loyiq.

Mazkur kitob ilmiy tadqiqot institutlari ilmiy xodimlari, etnografiya, tilshunoslik, O‘zbekiston tarixini o‘rganayotgan talabalar va professor-o‘qituvchilar, shuningdek, O‘zbekiston etnosi tarixiga qiziquvchilar uchun mo‘ljallangan.