20.04.2015

Xalqaro konferensiya doirasida va O‘zbekiston Respublikasi Vazirlar Mahkamasining 2012 yil 9 iyuldagi “Nodir, alohida qimmatli va noyob nashrlar saqlanishini ta’minlash, ularning fondini tizimli ko‘paytirish va boyitish chora-tadbirlari to‘g‘risida”gi 202-son qarori ijrosini ta’minlash maqsadida O‘zbekiston Milliy kutubxonasida «Konservatsiya va restavratsiyada an’anaviy va yangi materiallar va texnologiyalar» mavzusida seminar bo‘lib o‘tmoqda. 

2015 yil 20 aprel kuni boshlangan seminar Yuta universiteti Mariotta kutubxonasi (AQSh)  fondlarni saqlash bo‘yicha mutaxassis Rendi Silverman xamda konservatsiya va restavratsiya bo‘yicha mutaxassis Jamila Al-Me’mariyalar (Ummon) rahbarligida bo‘lib o‘tmoqda.

Seminarda RR-taqdimotlar hamda qog‘oz tayyorlashning qo‘l va mashina usullarini o‘rgatuvchi filmlar namoyish etilmoqda, konservatsiya va restavratsiyaga oid nazariy bilimlar  va o‘quv materiallari, qog‘ozlar va muqovalash turlari, nashriyot kitoblarini muqovalash ishi tarixiga oid keng ma’lumotlar berilmoqda. 

Seminar AQShning kutubxonalar nodir fondlari, arxivlar va muzeylar mutaxassislari uchun Fulbrayt (Fulbrait specialist) mutaxassislar almashinuvi maxsus dasturi asosida amalga oshirilmoqda. Mazkur seminarda respublikamizning turli axborot-kutubxona muassasalari, muzeylar, arxivlar va ilmiy-tadqiqot institutlaridan 30 nafar mutaxassis ishtirok etmoqda.

Seminar 22 aprelga qadar davom etadi.