Ibn Sino o‘zining ko‘p tarmoqli mahsuldor ijodi, boy merosi bilan jahon madaniyati taraqqiyotida katta rol o‘ynadi. Ibn Sino asarlari dunyoning ko’pgina tillariga tarjima qilingan. Jahon olimlari Ibn Sino asarlari, uning faoliyati to‘g‘risida ko‘pdan beri ilmiy-tadqiqot ishlarini olib boradilar. Hozirda jahondagi deyarli barcha tillarda Ibn Sino haqida asarlar yaratilgan. 

Belgiya katolik universiteti professori Yules Yanssens tomonidan Ibn Sino hayoti va faoliyati haqida 1970 yildan 1994 yilgacha yozilgan asarlarning bibliografik ko’rsatkichi 2 ta kitobga jamlab chop etildi va Belgiya kutubxonalariga tarqatildi. Ushbu asarlarning bittadan nusxasi muallifning iltimosiga binoan Alisher Navoiy nomidagi O‘zbekiston Milliy kutubxonasiga sovg‘a tariqasida taqdim etildi.